Category: 自編教材資源

學生文選【我的七逃伴】

學生文選【我的七逃伴】 沒有迴響

2011 年 06 月 03 日 at 04:18:34Category:學生文選

作者/吳芳宜

自細漢我是阿公阿嬤的糖酸丸,逐家甲我惜命命,毋擱我攏感覺足無伴矣,因為大兄恰阿姐加我足濟歲、逐擺我那是無藝倆想欲找秵耍攏嘛嫌我鎮地擱纏腳跤絆手。

會記得有一擺我趁大兄無佇厝,偷偷仔走入去伊的房間,耍電腦,無張弛去甲一寡仔重要的資料攏耍甲扑無去,大兄轉來看着足受氣甲我罵甲強欲臭頭去;彼兮時陣感覺家己足可憐,我嘛毋是牢故意矣,就那行那哭,心肝足甘苦,無敢去甲阿母tâu、欲去瑞啥人講咧!看着大箍仔對遠遠的所在行過來,雖然阮無蓋熟悉,毋擱看着伊,我的嚨喉管煞缜起來、愈哭愈大聲,伊惦惦聽我甲滿腹的委屈講出來,心情就加足好。自彼擺開始,阮就成作好朋友,逐工透早大箍仔就佇阮兜頭前等我,做伙去學校七逃、走標、鉍相找,三不五時仔嘛會倒佇運動埕看天頂的白雲咧變魔術;足奇怪矣!我那當着心情鬱卒的時,伊就隨來到我的身軀邊陪伴我,甘那我腹肚內的蛔蟲,到我讀一年開始,伊嘛逐工恰我去學校讀冊、陪我倒轉來厝,我恰大箍仔的感情愈博愈厚,莫怪阿母肯不動(kap 二着)就罵我查某囝仔人,厝內惦袂牢,歸工趴趴走;一直到有一工阿母欲載我去夜市仔,大箍仔看到就對(tùe)佇後壁遂,雄雄聽着「碰」一聲,心內挫一跳着,敢會是大箍仔去乎車撞到,遠遠就聽着大箍仔一直唉,我叫阿母緊斡–轉去,看著伊倒佇土跤,我趕緊甲抱(mooh)起來,載伊去乎醫生抹(kôo)藥仔,阿母即時陣才知影我的七逃伴就是即隻柴犬。

大箍仔經過彼擺車禍了後,行路嘛有淡薄仔各(koh)樣,乎我足煩惱,一直甲阿母要求,拜託乎我會凍甲大箍仔飼起來,阿母起頭無愛,到有一工風颱天,我聽到外口有狗仔咧hinn的聲,我走出去看,原來大箍仔來鉍佇阮兜的屋簷下(gîm  tsîⁿ  kha ),我趕緊走出去甲伊攬咧、想到我無法度乎伊一个鉍風雨的所在,我就哭出來,阿母看到即款情景就答應囉!無擱有一個約束,就是愛好好仔甲伊疼惜,自按呢!大箍仔就成作我尚貼心、無法度分開的七逃伴。

【四句聯】

【四句聯】 沒有迴響

2011 年 05 月 01 日 at 01:33:30Category:本土語俗諺集

四句聯

  1. 今日世界,自由戀愛,免人介紹,雙人意愛。
  2. 龍鳳相隨,代魚開嘴,夜夜相對,萬年富貴。
  3. 天地配合,成雙成對,夫唱婦隨,萬年富貴。
  4. 茶盤圓圓,甜茶甜甜,兩生合婚,冬尾雙生。
  5. 茶盤四方,金銀滿堂,新娘巧粧,新人財旺。
  6. 今夜洞房,燈燭輝煌,好話盡講,女貌才郎。
  7. 今日好日子,兩姓結連理,冬尾著該生,再擱來恭喜。
  8. 兩姓來合婚,日日有錢剩,予恁大家官,雙手抱雙孫。
  9. 新娘娶入厝,家財年年富,今年娶新婦,明年豬像牛。

10.  新娘真古意,鬧久會生氣,大家量早返,通予變把戲。

11.  大家趕緊行,予恁去輸贏,著愛緊打拼,連鞭做阿娘。

12.  廳堂全人客,男女數百個,喜酒飲真多,等待擱食茶。

13.  茶盤金金,茶甌深深,新娘新郎,那不相吻,此杯甜茶,我不敢飲。

14.  新娘捧茶手正正,房間出來蓮步行,一杯好茶來相請,致蔭翁婿早出名。

15.  婚姻雙方是情愛,家庭美滿大發財,新娘捧茶來相請,貴姓尊名說阮聽。

16.  人講做人三罷喜,第一就是結婚時,新郎新娘相合意,鴛鴦水鴨成一池。

17.  新郎新娘相意愛,良時吉日上武臺,英雄比武有限界,真槍射中風雲臺。

18.  新娘茶甌快來收,新郎新娘可自由,紅包給您添福壽,兩姓合婚配千秋。

19.  新娘捧茶行出來,小孩大人鬧猜猜,列位諸君坐乎在,敬老尊賢才應該。

20.  新娘美貌像天仙,天地註定好姻緣,在厝父母好教練,應該敬老後少年。

21.  新娘捧茶出大廳,也有糖仔冬瓜餅,甜茶新娘親手煮,要敬母舅頭一名

【俗語答喙鼓】

【俗語答喙鼓】 沒有迴響

2011 年 04 月 03 日 at 05:39:27Category:本土語俗諺集

【一】  一言既出.駟馬難追

甲:宴玲啊!故事冊咧?

乙:你咧講啥咪故事冊呢?

甲:hooh!你的記持有夠!昨昏你不是講欲借我故事冊?

乙:hann?敢有?

甲:ㄟ!做人愛有信用喔!人講 [一言既出.駟馬難追] 話若講會出喙,就愛做會

到!你那會使講話不算話?

乙:歹勢啦!煞乎袂記得!明仔載我才紮來借你。

甲:一定 愛會記得紮來喔!若無我就欲共妳<剝皮袋粗糠>。

乙:無通赫歹啦!咱兩介濟好,欲乎人驚死擱!

甲:共妳講耍笑啦!若無共妳嚇驚一下!你攏放外外,無當做一回事。即擺愛會記 得喔!

乙:是!遵命!

【二】  人若衰 種瓠仔生菜瓜

甲﹕唉呦喂啊!有夠疼喔!

乙﹕家淯也,是按怎呢?哪會唉甲按呢大聲?擱規身軀澹糊糊。

甲﹕煞毋知影頭陣仔去摒糞掃,轉來的時有夠衰,拄好拄著落大雨,沃甲規身軀澹糊糊。想欲走卡緊的,擱佇運動埕趴(tshū)一倒,摔一下有夠疼。

乙﹕唉呦!真正可憐喔!

甲﹕這猶無要緊。上衰的是擱予老師誤會講我走去耍水,乎罵甲強欲臭頭。真正是『人若衰 種瓠仔生菜瓜』,別人衰一遍,我連  衰三遍。

乙﹕有影是『有一就有兩,有兩就有三,無三不成禮』。恭喜喔!你欲出運矣!

甲﹕Heh!我都咧可憐矣! 你擱咧共我摳洗。

乙﹕無啦!你煞無聽人咧講:「三年一潤,好歹照輪」。你已經連衰三遍,歹運攏過去矣。擱來一定會有好運。

甲﹕向望是按呢。

【三】你看我phú phú,我看你霧霧

意為:你看無起我,我嘛看無起你,彼此互相輕視。

有一個真平靜的樹林,受著一擺恐怖的風颱的破壞,互這個原本真súi、真平靜樹林,佇一暝中間變東倒西歪。樹林內的鳥隻、蟲類、野獸攏匿佇家己的岫內面毋敢出來。第二工透早,恐怖的風颱總算過去,一隻狗蟻爬出來探頭看覓咧,看外面無風雨矣,才thǹg出來。狗蟻四界相相咧,發現著四界攏是互風颱折斷去的樹枝,樹枝跤有一物件咧震動,牠詳細共伊看,看出到底是啥mi̍h物件?「咦!這是啥mi̍h怪物啊?」「我毋是怪物,我是蝶仔的蛹。」原來是樹頂的蝶仔蛹,互風吹落來的。「親像你生作遮爾bái,無腳也無手,更加無翅,欲怎樣作阮的蟲類?真是見肖。你看我有六隻跤,外爾liu掠。」狗蟻講了斡頭做伊走。

過了幾工後,狗蟻拍算欲出去尋食物,因為風颱帶來的雨水,塗跤四界攏抑咧積水,所以行路實在無方便,「這種路是欲安怎行?我真歹命。」「狗蟻先生,你毋是講你的跤真liu掠,為啥mi̍h看你親象行震動的感覺。」狗蟻聽著舉頭看,一隻真súi的蝶仔佇伊的頭殼頂咧飛,「你是誰?」「我是幾工前,互你共我恥笑的蝶仔蛹啊!即馬,我已經變作蝶仔矣,可以佇天頂飛來飛去,抑你咧,卻被困佇爛塗內面行震動,實在有夠可憐喔!」

小朋友,通過這個故事,欲共咱講:平常時毋通凊採看輕人,無的確是烏矸仔貯豆油,無底看。所以你看人phú phú,反勢捌人嘛看你霧霧。


【四】新的袂來,毋知舊的通保惜

意為:勸人要珍惜現在擁有的。

古早,古早的時,佇一個樹林內,蹛真濟動物,遮个動物互一隻獅仔作的王。但是獅仔一工一工老矣,逐家就開始嫌獅仔無路用矣,無資格閣管矣。逐家著相及參詳,欲怎樣互獅仔家己自動退休,有人著共獅仔講:「你即爾老矣,甘有法度閣保護阮?」「是啊!若是愛你去共人類相揠,你甘有才調?」「我看抑是阮來保護你喔!」逐家人一句來一句去,獅仔只好共逐家宣布,從今以後,伊欲將王為讓互少年人矣。逐家聽著消息攏真歡喜,著開始計畫欲互啥mi̍h人來作王較好?狐狸講:「互長頷鹿啦!因為伊上懸,會駛替咱注意人類的方向。」長頸鹿講:「毋通,抑是互印度豹啦!因為伊較gâu走。」印度豹講:「毋通,抑是互大象啦!因為伊較大隻。」大象講:「毋通,我動作卡慢,無適合啦!」即時陣猴仔佇邊仔著講:「看起來抑是我上適合矣,因為我頭腦上巧,動作上緊,甘抑有人比我閣較有資格?」逐家聽了後,想想咧,參詳了後,著決定互猴仔作ㄟ王。

猴仔作王了後,啥mi̍h代誌攏毋做,只是一支喙喝東喝西,逐家人攏愛伺候伊,若是無歡喜閣會罵東罵西。日久月深,狐狸開始凍條伊的鴨霸,著想欲共猴仔教示一下。有一工,狐狸走到猴仔ㄟ面前講:「大王啊,我發現著有一個所在,有真濟你愛食的果子,我毛你來去。」猴仔一聽著有好食的果子,著佮狐狸同齊去。果然看著真濟果子疊甲若山咧,猴子一歡喜著走過去,忽然聽著後面「卡嚓」一聲,才發現著一已經互狐狸關佇籠子底矣。「喂!放我出去。」狐狸講:「親像你即爾鴨霸的人,因該愛下臺,阮抑是甘願互獅仔作阮的王啦!」

經過這件代誌了後,所有的動物才發現著抑是獅仔作因的王較適當,這就是「新的袂來,毋知舊的通保惜。」


【五】三日偎東,三日偎西

意為:指為人勢力,忽東忽西,見風轉舵的人。

佇非洲的一片大草埔,萬獸之王大獅準備欲食一頓仔膨派的中晝頓,這時陣,忽然有一隻大隻的獵鴞對天頂飛落來,將伊的中晝頓搶走。獅大王真生氣大聲叫講:「吼!可惡的獵鴞,阮野獸國及恁鳥仔國一向『田無溝,水無痕』無想著你敢來搶我的物件,真是好大膽,從今以後,我決定及你勢不兩立。」獅仔大王著馬上召集所有野獸國的動物,準備欲好好修理鳥仔國。野獸國的動物知影鳥仔攏是暗時仔咧歇睏,著趁鳥仔無防備的時共攻打,果然無兩三下著互因拍甲悽慘落魄,死的死,逃的逃。這時陣,一隻日婆看著這種情形,趕緊將家己的翅收起來,走到獅仔大王的面前講:「偉大的獅仔大王啊!我是鳥鼠親晟,請您互我加入恁的野獸國吧!」獅大王真歡喜,著答應互日婆加入。

日婆加入了後,無想到第二工獵鴞竟然毛一大陣的鳥仔,趁野獸國無防備的情形之下,忽然發動大規模的反攻。真緊野獸國著互鳥仔國的人馬啄甲亂七八糟。日婆看著野獸國輸矣,著緊閣共翅展開,走去獵鴞面前講:「偉大的獵鴞大王啊!我嘛有翅啦,請您互我加入恁的鳥仔國吧!」獵鴞真歡喜著答應互日婆加入。

續落去的日子,兩方不時著你拍我,我拍你,不是你輸著是我贏。後來,相方感覺安爾落去毋是辦法,著講和無閣再相戰。日婆為著欲保存家己的性命,「三日偎東,三日偎西」,連鞭講伊是野獸國,連鞭閣講伊是鳥仔國,這個事志時間一久,去互兩國的人發現日婆是一个「食西瓜偎大傍」的卑鄙小人,逐家攏無愛閣佮伊作朋友,嘛無愛互伊加入因的國,閣共伊趕出去。日婆感覺真見肖,著匿入去山洞內面毋敢出來。

【嫁娶講好話】

【嫁娶講好話】 沒有迴響

2011 年 04 月 03 日 at 05:37:26Category:本土語俗諺集

  1. 手牽手,天長地久。喙抵喙,萬年富貴。
  2. 尪某感情糖蜜甜,二人牽手出頭天。闔家平安大賺錢,囝孫富貴萬萬年。
  3. 門當閣戶對,榮華兼富貴,今晚日子美,趕緊送做堆。
  4. 天地配合,成雙成對,夫唱夫隨,萬年富貴。
  5. 新娘真水真好命,內家外家好名聲,準備甜茶來相請,祝福金銀滿大廳。
  6. 我看茶盤真正重,新娘不通家己捧,著叫新郎鬥相工,夫妻協力來幫忙。
  7. 新娘女德好品行,讀冊做過模範生,甜茶相請真欽敬,配夫發達萬年興。
  8. 食恁一支菸,互恁尪某年年春,食恁一杯茶,互恁年底生雙個。
  9. 新娘生做真正美,親像早朝楊貴妃,毛烏肉白真高貴,夫妻恩愛永相隨。

10.  兩家來合婚,日日有錢春。互恁大家官,雙手抱雙孫。

11.  大家緊起行,互姻去輸贏。著愛較打拼,連鞭做阿娘。

12.  吃恁1杯甜茶,好話1句送乎恁兩個,尪某和好相體貼.保證恁有田園擱有地。

13.  茶盤金金,茶甌深深,新郎新娘無相唚,這杯燒酒我毋 林。

14.  新娘真正美,冬尾生一對,一個做國大,一個選立委。

15.  恭喜恭喜真恭喜,新郎才華了不起,新娘賢慧通鄉里,二人適配無地比。

16.  茶杯捧懸懸,囝孫中狀元。茶杯捧落低,趁錢無地下(無處放)。

17.  今日娶新婦,入門蔭丈夫。明年起大厝,珠寶歸身軀。

18.  新娘茶甌緊來收,新郎新娘可自由,紅包乎恁添福壽,兩姓合婚配千秋。

19.  新娘真古意,鬧久新郎會生氣,大家返來去,乎因二個做把戲。

20.  新娘大方,學問相當,英語會講,腹內能通。

21.  新郎緣投有智慧,新娘可愛又古錐,今暗二人卜作堆,明年一定生後生。

22.  茶杯捧過來,互你大發財。茶杯捧過去,尪某有福氣。

23.  新娘娶入房,燈燭滿廳堂,房間新巧裝,新被新眠床。

24.  卜食新娘一杯茶,互恁一年生雙個。一個手裡抱,一個土腳爬。

25.  民主時代,自由戀愛,免人紹介,雙人意愛。

26.  人客坐滿廳,聽著杯仔聲,新娘在準備,有食嘸免驚。

27.  捧出甜茶來相請,夫妻一定好名聲,新娘做人真四正,講話明理人人聽。

28.  新娘好學問,今日配良君,翁姑著孝順,百子傳千孫。

29.  一對佳人結尪某,兩人牽手共甘苦,三世修來真福報,四季平安好前途。

30.  食茶古例傳至今,夫妻和好真同心,新娘入門會致蔭,尪婿發財千萬金。

31.  人講做人三擺喜,第一就是結婚時,新郎新娘相甲意,洞房花燭剝未離。

32.  新娘父母有教示,明理大方好女兒,厝邊稱讚到搭舌,娶到的人有福氣。

33.  新娘捧茶對面來,印仔大小鬧猜猜,親戚朋友坐在在,敬老尊賢是應該。

34.  手捧甜茶講四句,新娘好命蔭丈夫,奉敬大官有可取,田園建置千萬區。

35.  今日新娘娶入門,點燈結彩滿廳堂,房間佈置真巧裝,新式繡被新瞑床。

36.  逐項物件食透透,來甲新娘討紅包,有量有福做會到,囝孫興旺個個敖。

【頂港有名聲,下港有出名】

【頂港有名聲,下港有出名】 沒有迴響

2011 年 04 月 01 日 at 01:34:50Category:本土語俗諺集

甲:考試拄考了,我的分數袂䆀呢!阮阿爸講欲帶阮去七逃,擱食好料e!

乙:看你遮歡喜,是欲去佗位咧!

甲:阮欲去看蓮花兼食蓮子大餐。

乙:遮呢好康!欲去竹山的佗位看蓮花。我嘛欲叫阮爸爸載我去。

甲:唉呀!你真正是古井水雞,咱老師嘛曾講過,就是﹝頂港有名聲,下港有出

名﹞的台南縣白河鎮阿!

乙:喔!我雄雄袂記得!對hōⁿ!﹝頂港有名聲,下港有出名﹞是啥咪意思咧!

甲:喔!你上課攏無認真聽!耳空iah乎利,一个人亦是一層代誌的知名度足高ê俗語著是﹝頂港有名聲,下港有出名﹞

乙:真正有夠漏氣!後擺上課我欲甲你共款卡認真e!

表演短劇.劇本

表演短劇.劇本 沒有迴響

2011 年 02 月 22 日 at 22:57:41Category:自編教材資源

下晡阿公拿一領衫入來客廳,看着阿嬤咧盹龜就搖頭講:「唉!莫怪人講食老有三䆀: 盹龜.哈欠.流目屎.坐咧就盹龜。喂! 喂! 老仔.衫的鈕仔落去矣!甲我的鈕仔縫乎好。」阿嬤站起來哈欠.揉目賙講:「甲針線夯過來!」阿公夯針線乎阿嬤. 阿嬤夯着針線目賙展甲大大蕊.掠針空金金相講:「人那食老目賙無好. 針空攏相袂準.穿袂過。」

這時陣阿爸轉來厝裡.隨甲阿嬤的針線接過來.一下着穿過去,伊著甲小弟和小妹講:「阿嬤一世人辛苦打拼.阮那甘苦病痛.伊着無暝無日照顧阮.後擺恁愛好好啊有孝阿公.阿嬤.知影無?」小弟和小妹就講:「阮一定會好好啊有孝阿公阿嬤.嘛也有孝你和阿母。」阿母就講:「後日是母親節.咱帶阿公和阿嬤來去遊玩。」

阮即馬代表一年仔的小朋友祝全天下的阿母{母親節快樂}因為{媽媽妳是我的最愛}